سونرالار دانیشا بیلمه‌سن
امیر باجیم اوغلودور، تزه بیر یاشی قورتاریب. هرگون اولدوغو کیمی سحر چاغی باجیم‌لا امیر بیزه قوناغیدی، البته قوناق کی نه عرض ائدیم اولجه ائولندیکده سئوینیردیم کی ائولندی گئتدی و قولاغیم دینج اولاجاق، آما تانری هئچ کافره گؤسترمسین بو قیزی! ائوده اولمادیغی گونلر زنگ آتاجاق: نهار یئییب‌سن؟ تلویزیون‌دا نه‌یه باخیرسان؟ شاما نه وار؟ ائوده کیم وار؟ پریا هاردادی؟ و ... خلاصه منیم آخیریما چیخان بیر نفر اولسا اودا ائله بو باجیم اولاجاق واللا. ائوده اولان گونلر‌ده‌کی ماشاللا، آمان دی امیر ییری‌مه یئخیلارسان، آی امیر نه اولدو، امیر اورا گئت‌مه، امیر اونو گؤتورمه، امیرفلان، امیر ... و آخیر اوشاغی چیغیردیب دینجلیر! اوشاقدا نئینسین یازیق، دانیشا بیلسیدی دیردی ال‌چک سن آللا قوی بیر دیقه قولاغیم دینج اولسون.
او گونو ده یئنه امیر آغلاییردی (تزه‌لیکده اؤیرنیب هر بیر خیردا ایستگه آغلایا، آناسیدا درحال ایستدیگینی وئریر کی امیر سوسا آما بونونلا دا اونو سیرتالدیر منجه)، بیر آن بونا دوشوندوم کی امیر ایستدیگینی دیله گتیریب دیه بیلمیر، باجیم دا اورا دوروب امیر نه ایستییرسین؟ نه؟ نه؟ اودا آخیر زورونو ووروب باغیریر هردن بیر دئییر ماما ماما، ماما نین ایکینجی مایین اوزادماقلادا بیر شئی ایستدیگینی بیلیندیریر و هی سسینی اوجالدیر و آغلاییر (باغیریر).
بیر آن اؤزومه دئدیم نه یاخشی‌کی امیر دانیشمانین لذتینی هله دادماییب، هله بیلمیر ایستدیگی دیه بیلسه نئجه راحات اونو الده ائده بیلر، دانیشا بیلمیر دیه الینی اوزادماقلا، سس سالماق یا آغلاماق یادا هردن بیر اونو-قوقو-هوو-و بونا بنظر سس‌لرله ایستدیگینی گؤسترمک ایستییر، امیر باشقا بیر متد دا ایلگی قورمانی باجارمیر هله، اؤیرنمییب هله، آما آستا-آستا اؤیرنیر، دانیشمانین لذتینی دادماییب دیه اونو اؤیرنمکده ده تلسمیر و سیخینتی چکمیر .
بونلارلا بیرلیکده بونادا دوشونوردوم کی نقدر چتین اولار بیرگون بیردن بیره دانیشا بیلمیه‌سن. اؤزوموزو دوشوندوم، بیردن بیره سوسدورولدوق. ایندی بیر شئی ایستینده اونو آنلادماق اوچون نقدر چتین‌لیک چکیریک، عینن امیرین چیغیرمالارینا بنظییریک هردن.
