یای فصلی و کولئر حاقدا بیرسیرا بیلگی‌لر
هر ایل یای فصلی‌نین ایستی‌سی شهره چؤکرکن، ائو و ایش یئرینه گرکن کولئر آلماق اوچون اؤنوموزه چیخان سئچیملر و سورولارا جواب آختارماغین زامانی اولور. هانسی برند کولئر الاق؟ نئچه BTU گوجو اولسون؟ هانسی داها آز برق ایشله‌دیر؟ و ...؛ بو یازیدا بو سورولارین بیر سیراسینی جوابلایاجاییق.
۱: کولئرین گوجونو گؤستره‌ن BTU نه دیرو قوراشدیریلاجاق یئرین ائنی-بویو ایله نه ایلگی‌سی وار؟
هر بیر کولئرین سویودوجولوق (و ایستیلدمه) گوجونو گؤسترمک اوچون، اونون اوستونده بیر رقم یازیلیر، اؤرنک اوچون ۹،۱۲،۱۸،۲۴،۳۲ و یا ۴۸ مین BTU. هر بیر بی‌تی‌یو (British termal Unit)، بیر پوند سویو (۱ آتموسفئر فشاردا) ۱ درجه سویودا/یا قیزدیرا/ بیله‌ر. اویغون BTU سئچمک بیر نئچه فیلده باغلی دیر، اؤرنک اوچون ۱: اوتاغین کَفینین مساحتی (هوندورلوک ۳متیر نظرده آلینیر)، ۲: پنجره لرین یئری و اؤلچوسو، ۳: کولئر قوشولان یئرده اولاجاق آداملارین سایی، ایشیق سیستمی و ... . بونلاردان باشقا هانسی شهرده (سودان هوندورلوک، قوراقلیق یا نملیک ییرلر، اَن سویوق و اَن ایستی گونلری) و بیر سیرا باشقا فیلدلری نظرده آلماساق دیه بیله‌ریک ۴۰ مترمربع مساحته ۱۸ مین، 60 مترمربعه ۲۴ مین، ۸۰ متره ۳۶ مین و ۱۱۰ متر اوچون بیر کولئردن آرتیق گرکیر.
۲: قاز و سو کولئریلرینین نه فرقی وار و هارادا هانسی یارارلی اولا بیله‌ر؟
سو کولئرلری نملیک آرتیریر، قورو هاواسی اولان شهرلرده سو کولئری ایشله‌نر، قاز کولئرلری هاوانین نملیگینه اثر قویمور، بیرتک ائوین هاواسینین ایستی‌سینی آلیر. نملیگی چوخ اولان یئرلرده داها چوخ قاز کولئری ایشلتمه‌سی اؤنه‌ریلیر. اؤرنک اوچون: تبریز، تهران، اصفهان هاواسینین نملیگی آزدیر بس بو شهرلرده سو کولئری ایشلتمک اولار، موغان، آستارا، اورمو هاواسینین نملیگی چوخ اولدوغونا گؤره، قاز کولئری ایشله‌نر.
۳: ایسپیلیت و بیر تیکه کولئرلرین نه فرقلری وار؟
هر کولئرده ایکی رادیاتور اولور، بیرینده سویوق قاز دولانار و او بیری سینده ایستی قاز. بیر تیکه کولئرلرده (پنجره کولری آدیلا تانینان) هاوانین ایستی سینی آلان سرینلدیجی رادیاتور و ایستی قازی سرینلدن رادیاتور بیر قوتو دا یئرلشدیریلیب، هله کوبود گؤرونتوسونو نظرده آلماساق ائله بو ایشاره ائتدیییمیز بیرینجی ندن، کولئرین راندمانینی آشاغی ائندیریر. ایسپیلیت کولئرلرده بو ایکی یونیت بیر-بیریندن آیریلیب. اوچونجو مسئله ده کولئرین کمپرئسورونون سسی دیر، ایسپیلیت کولئرلرده بو یونیت آیری دیر دیه، کمپرئسورون سسی ده ایچ یونیت قوراشدیریلان یئردن اوزاقدا اولور.
۴: اینوئرتر و عادی کولئرلرین نه فرقی وار؟
کولئرلرین اَسکی اوتماتیک مکانیزمینده، قاز کولئرلرین کمپرئسور موتورو نه گوجده اولدوغویلا ایلگیلی، هر سئری استارت گؤتورنده ۹-۱۵ آمپر برق آخیمی چکیر، هر گون نئچه سئری اوتماتیک ائدیرسه موتورو سؤندورور و یئنیدن ایشله‌مه‌سی گرکن واختی یئنه‌ده همن آخیمی هدره وئریر. اینوئرتر مکانیزمینده بو استارت گؤتورمه‌لر ۱ سئری کولئرین ایشله باشلاماسیندا اولور و اوتمانیک ائتمک گرکن واختلار داها کمپرئسور موتورو سؤنوب، یئنیدن استارت گؤتورمور، سورعتینی آزالیب چوخالیر. بوندان باشقا همن موتورلار تک فاز برقله یوخ اوچ فاز برقله ایشله‌ییرلر و ائوین عادی تک فاز برقینی همن کولئرلرین ایچینده یئرلشدیریلمیش برق اینوئرتئری اوچ فازا چئویریر. سونوجلارین بیری موتورون تئز-تئز اوتماتیک ائده‌نده آرتیق آخیم (جریان) چکمه‌سینین قارشیسی آلینیر و ایکینجی، موتورون سورعتی آزالان واختلار (ائوین سرینلیگی قورولان درجه‌یه چاتان واختلار) داها آز برق ایشلتدیگی اولور.
۵: کولئر و اؤزللیکله ایسپلیت کولئر قوراشدیریلان چاغ نه‌‌لره دیقت یئتیرمک گرکلی‌دیر؟
بو سورونو ایکی بؤلومه بؤلمک داها دوغرو اولار، بیرینجی آلیجیلارین ایستک لری و ایکینجی کولئری قوراشدیران اوزمانین نظرده آلدیغی استانداردلار. آنجاق، بیر چوخ واختلار آلیجی ائوین دیزاینینی اوستون توتور دیه بو استانداردلاری آچیقلاماق یئرلی اولار.
-کولئر ائوین سقفینه یاخین یئردن ایستی هاوانی اؤز ایچینه چکیر و ایستی‌سینی آلیر، بس اَن چوخو سقف دن ۴۰ سانتی متر آشاغیدا اولمالی دیر.
-سویودولموش هاوا ائوین اوزوناسینا گئری قایتارمالی‌دیر و اؤنونده مانع و یاخین دووار اولمامالی دیر یوخسا ائوین اوزاق طرفی سرین‌لشمه‌میش کولئر اوتماتیک ائده‌ر.
-اوتاقلارا سیرین هاوانین آخیمینی یؤنلتمک اوچون او اوتاقلارین ایستی هاوانی دیشلاماق یولو اولمالی‌دیر.
-قاپی/پنجره تئز-تئز آچیلمامالی‌دیر.
-ایکی طبقه ائولرین پیله‌سی ائوین سالونوندان اولورسا، ایستی هاوا اوست طبقه‌یه طرف آخیب گئده جک و او طبقه لری سرینلدمک اوچون داها گوجلو کولئر گرکه‌جک.
-بیر سیرا ائولرده یاتاق اوتاغی بیر نئچه پیلله سالون دان هوندور تیکیلیب، او اوتاقلارین هاواسی داها ایستی اولاجاق، ایستی هاوانین دیشاری چیخماسی اوچون بیر خیردا پنجره همشه آچیق اولمالی دیر.
-آشپازخانا ائوین اَن ایستی یئرلریندن دیر و کولئرین سویوددوغو هاوایا عکس تاثیر قویور، هود و پرده بونون قارشی‌سینی الا بیله‌ر.
-پنجره‌لردن پرده آسیلارسا، گوندوزلر کولئرین داها ائتگیلی سرینلدمسینه یاردیم ائده بیله‌ر.
-ایسپیلیت کولئرلرین دیش پنئلی اوچون نظرده توتولموش یئر، ایچ پنئل‌دن آلچاقدا اولمالی‌دیر (دیش پنئلین یاغی ایچ پنئله قلییدماسین دیه).
-دیش پنئلین دووار اوتوراجاغیندا قوراشدیریلماسی، دام اوستو و حیط‌ده یئرلشدیریلمه‌سیندن داها تهلوکه‌سیز دیر.
-دیش پنئل دام اوستو یا حیط‌ده قوراشدیریلیرسا، آلتینا یئردن آزی ۲۰ سانتی متر هوندور ساخلایان اوتوراجاق گرکیر (قار یا یاغیش، ایستی کمپوسورون بدنه سینی چارتلادا بیله‌ر).
-دیش پنئل دام استونده قوراشدیریلیرسا، رادیاتورون ایستی دیشلاماسیندا گونون ایستی‌سی عکس تاثیر قویماسین دیه، اونون اوستونه کؤلگه‌سالماق گرکیر.
-دیش پنئل قوراشدیریلدیغی دووارین اوستو سقف دیرسه، سقف‌دن آزی ۲۵ سانت آلچلق اولمالی‌دیر (سونرالار تعمیر اوچون پنئلین یئره گتیرمسینین قارشیسی آلینیر).
-دیش پنئل تراسا قویولورسا، اونون اؤنونده آزی ۲ متیر هئچ بیر مانع اولمامالی دیر.
-دیش پنئل دام اوستونه قویولورسا، او شهرین بیر طرف دن همشه اَسَن کوله‌یینه دیقت یئتیریلمه‌لی دیر، دیش پنئلین فَنی، بو کولک‌له عکس جهت‌ده فیرلانمامالی دیر.
-کولئرین برقی، کونتوردان کولئره قدر اؤزل بیر کابل‌لا، ائوه چکیلمیش برق سیم‌لریندن آییریلما‌لی دیر، کنتورا اَن یاخین یئرده ده کولئرین فیوزو باغلانما‌لی دیر.
-ایچ و دیش پنئلن آراسیندا اولان میس لوله‌لره ساریق دولاماق گرکیر یوخسا هاوا اونو اکسید ائده‌ر.
۶: قارانتی‌سی اولان کولئرلردن بیرینی آلاق یوخسا قارانتی سیز؟
تاسفلرله بیر سیرا ندن‌لره گؤره بیر پارا ساتیجی‌لار هر بیر رئکلام یوللاریندان کولئر ساتماق اوچون فایدالانیرلار، او جومله‌دن اؤرنک اوچون موتورو آمئریکا مالی‌دیر، قوراشدیریلماسی پولسوزدور، هر نه لازیم‌دیرسا گتیریب قوشاجاقلار و بوناتای سؤزلر دئییرلر کی بیر موشترییه کولئر ساتیب منفعت ائتسینلر، او هالداکی بو یالان سؤزلری دئمک اوچون هئچ بیر ندن ده یوخدور و سونرالار همن ساتیجینین موشتری اَلدن وئرمه‌سیله سونوجلانیر.
اؤرنک اوچون نظرده آلین قارانتی‌سیز بیر کولئر آلیرسینیز، قازی اولماسا یا رادیاتورو دئشیک چیخسا، اونون دَییشیلمه‌سی و یا تعمیری اوچون داها چوخ پول هدره وئرملی سینیز. دوزدور دولار قیمتینه گؤره قارانتی‌لی کولئرلرین قیمتی بیر آز باهادیر آما بونو دا نظرده آلین قارانتی‌سیز هر بیر قطعه آلماغا مجبور قالسانیز یئنه همن دولارلا حساب اولوناجاق و قارانتی سیز اولدوغو اوچون اوجوز حئساب اولنمایاجاق. قارانتی‌لی بیر کولئر آلدیقدا، قوراشدیریلان چاغ رادیاتورو دئشیک اولدوغو، قازینین اولماماسی، موتورونون ایشله‌مه‌سی، مدارینین خاراب اولماسی و یا هر بیر آیری چاتیشمامازلیق اوزه چیخیرسا، قارانتی ائدن شیرکت طرفیندن اَن یاخین زامان‌دا همن قطعه‌لر پولسوز جاسینا تامین اولونور. قارانتی زامانی بیتمه‌میش سرویس مرکزلرینده قارانتی‌سی اولان هر بیر پروبلئم یئنه پولسوزجاسینا حل اولونور. قارانتی‌نین شرایطی، قارانتی کارتیندا یازیلیب. بونو دا آرتیرمالییام بیر سیرا شرطلرین آیدین یازیلماماسی بعضن بیر باشقا پروبلئمه چئوریلیر. اؤرنک اوچون بو ایکی جومله: “قوراشدیریلما پولسوزدور” و “ایاب ذهاب” هزینه‌سی‌نی آلیجی اؤده‌ملی دیر و “قوراشدیرماق اوچون ایشله‌نیلن ماتریاللاری آلیجی آلمالی دیر”.
۷: هانسی برند لر یاخشی دیرلار؟
بو سورویا جواب وئرمک اوچون یاخشی‌نین موشتری اوچون نه آنلامدا اودوغونو آچیقلاماقلا جوابلار اؤز اؤزونه سیرالانیرلار؛
-اوجوز اولسون: برند و قارنتی اؤنملی دئییل.
-داواملی اولسون: تحریم‌لر و بیر طرفدن ده استحصالچی‌لار محصولون سرویسیندن منفعت قازانماغا دوشونه لری، داواملی محصول تعریفی بئله گؤستریر: اگر داواملی اولورسا بو داوام نهایت ۵ ایل اولا بیله‌ر.
-سرویسی هر زامان اَلوئریشلی اولسون: قارانتی‌سی اولسون، حتی تحریم شرایطینده ده لازیمی قطعه‌لری تاپیلسین؛ بو باخیمدان سئچیملر بارماق سایی قدر آزالیر. آلمان، ایتالیا، کانادا، فرانسا، آمئریکا و بیر نئچه اؤلکه‌نی چیخاندا قالیر بیر تک گونئی کره محصوللاری.
۸: کولئری یوماق اولارمی؟
هر ایل کولئری ایشلدممیش‌دن اؤنجه اونو سرویس ائتمک گرکیر. کولئرین یوسودوجو مکانیزمی کومپرئس اولموش قازی رادیاتورا بوراخماق و ائوین ایستی هاواسینی همن رادیاتورون پرده‌لرینین آراسیندان سووشدورماق‌لا اونون ایستی‌سینی آلماق دیر، بو ایستی هاوا، ائوده اولان توزلار دا یوخاری قالدیریب، کولئرین رادیاتورونون نملی پرده‌لرینه یاپیشدیریر. پرده‌لرین آراسی پالچیغا بنزه‌میش توز-تورپاقلا توتولور، سونوج دا رادیاتورلارین سویودوجولوق مکانیزمیندن دیشلانماسی اولور. بو اوزدن هر ایل کولئری ایشلدممیش‌دن اؤنجه، رادیاتورو یوماق اؤنریلیر، بو ایشی گؤرمه‌دن اؤنجه کولئرین فَن و مدارلاری آچیلمالی دیر. بو ایش اوزمانلیق طلب ائدیر دیه اؤنریلیر سرویس مرکزلرینه تاپشیریلسین.
۹: کولئری نئچه درجه ده ایشله‌دک؟
سهو تصوورلردین بیری کولئرین درجه سی و اونون بوراخدیقی سویوق هاوا آراسیندا ایلگی اولماسی و کولئرین سویوق هاوانین سرینلیگی، قورولان درجه‌ایله آزالیب/چوخالماسی دیر. آنجاق حقیقت باشقا جورا دیر، اؤرنک اوچون ۲۴ درجه سرینلیک سئچیلیرسه، ائوین هاواسی یوخ، کولئره گئری دؤنن ایستی هاوانین سرینلیگی ۲۴ درجه اولان واختی داها سرینلدیجی رادیاتوردا سویوق قازین دولانماسینین قارشیسی کمپرئسورون سوندورولمه سیله آلینیر. دئمه‌لی ائوه بوراخیلان سویوق آزالیب چوخالمیر، ائوین سرینلیگی ایسته نیله‌ن درجه‌یه چاتدیغی چاغدان کولئرین بیرتک فَنی ایشله‌ییر؛ ائوین سرینلیگی قورولان درجه‌دن بیر ایکی درجه یوخاری قالخدیغی چاغ یئنیدن کمپرئسور ایشه باشلاییر و سویوق قاز رادیاتورا یورودولور.
اینسانین بدنینین نورمال ایستیلیگی ۳۲ درجه دیر، کولئر ائوی ۲۷ درجه‌یه قدر سرینلدسه بئله، بیز همن سرینلیگی حیس ائدیب دیشارینین ایستی‌سیندن فرقلی اولدوغونو آنلاییریق. بیر سیرا تصوورو ائدیرلر کولئرین اوستونده ۱۸ درجه سویوقلوق ایمکانی یازیلیب‌سا ائوی ۱۸ درجه سویوقلادماق داها یاخشی اولار، بو دا سهو دیر. بیر آندا ۳۲ درجه‌دن ۱۸ درجه سرینلیگی اولان یئره کئچمک ساغلاملیغی تهلوکه‌یه سالا بیله‌ر بونون عکسی ده تهلوکه‌لی دیر. کولئری نئچه درجه‌یه قورماق سوروسونون جوابی شهردن شهره فرق ائده‌بیله‌ر، عومیت‌ده ساده‌جه ۳۲ درجه‌دن نهایت ۸ درجه سرین اولماسی یئترلی اولار. اوندان چوخ سرینلیک اوچون صرف ائدیلن انرژی هدره گئدیر.
۱۰: ایسپیلیت کولئرین یئرینی دییشمک واختی اونا قاز ووردورماق گرکلی‌دیر می؟
یوخ. کولئرین قازینی چوخ راحات کمپئسورا گئری قایتارماق اولور.
* هانسی گوجده کولئر سیزه گرکیری حئسابلاماق اوچون بو لینک‌دن فایدالانا بیله‌ر سینیز: http://www.goldiranac.com/btu/
* ائوی تیکمک زامانی کولئره یئر آییرماق بیر چوخ هزینه لرین قارشی‌سینی آلا بیله‌ر، تاسفلرله بو گونه قدر معمارلار بونو نظرده آلماییبلار، گرکن یئرلر ده هله بو ایش اوچون استانداردلاری تعریف ائتمه‌ییبلر، چوخ یاخشی اولار معمارلار و کولئر قوراشدیرما اوزمانلاری بو قونو دا ایش بیرلیک آپارالار.
