آتاسیز چاغلارین باشلانیشی.
آتام ۱۳۱۳ده دوغولوب، آتاسینین آدی یونوس اولوب، اونون دا آتاسینین آدی موسی، اونوندا آتاسینین آدی پناهعلی(سهو ائتمسم). موسی لنکراندا یاشاییرمیش آتامین آدینی موسی سئچمیش، سوی آدیمیز دا (آتامدان اؤنجه) پرنیان اولوب.
موسی، یئتکینلیک یاشیندا چاتمامیش خوبئیره-نی گؤروب بیهنیر، خبیره-نین آتاسینین آدی اسمایل اولوب، سوی آدی دا معمری. اسماعیل-ین ننهسی ده سید قیزی ایمیش. دئییرمیش 'منیم اؤلکم وار، قیزیمی اوردا اَره وئرهجم' (گونئیی دئییرمیش). قیزی وئرمدیکده گؤتوروب قاچیردیرلار آستارادا بیر کندده یاشاییرلار. خبئیرهنین آناسی 'گول روخ'-دا سید قیزی ایمیش.
آتام دئییردی اوشاق چاغلاریندا، یاز چاغی موسلمان، ائرمنی-روس ساواشی باش وئریر، او واختی موسلمانلارین باشچیلاریندان بیریده موسینین داییسی طرفدن اولان 'میر تنها' (یوزباشی) اولوب. سهو ائتمسم مظفر و یوسیف عمیلری ده باشچیلاردان ایمیشلار. بیزی گونئیه گؤندرن ده ایله 'میر تنها' اولوب. گلیرلر گونئیده بیر کندده یئرلشیرلر ('پیلهچای' دا)، کندین کادداسی دا ۵ ایلدن چوخ اونلاری ایران دئولتینه ساتماسین دیه اونلاردان روشوت آلیرمیشلار.
بؤیوک قارداشیم رضا دونیاسینی دییشنده آتام بیرینجی دؤنه سکته ائتمیشدی. نئچه آی اؤنجه ده آتام اوچونجو سئری سکته ائتدی، او چاغدان بَری ائوده یاتیردی، آی باشی دوقتور اورهیینین نوارین آلیردی و داوالارینا باخیردی. اَلیمدن گلن ده بیرتک حاماما آپارما، اوزونو قیرخما، پالتارینی دییشمه و باشقا یازماغا راس گلمیهن ایشلر ایدی. دونن سحر چاغی آتامین 'های وحید' سسیله یوخودان اویاندیم، اورهیی یئنه اینجیدیر دئدی. آپاردیق خستهخانایا.
بو دؤنه ائوه گلدیکده سانمیرام خبر آلا بیلم، پورتلیچده یاشایان عمی قیزینین آدی نه دیر آستاراداکی کند او تای آستارا ایدی یوخسا بوتای؟ سینیر چکیلن واختی هانسی خانین اینگیلیزلردن نقدر پول آلدیغینی دا بیر آز دقیق خبر آلیب یازاجایدیم، موغانین کئچمیشیندن داها آرتیق اؤیرنمک ایستهییردیم و ... آتاسیز یاشاماق چاغلاریم دا آستا-آستا یاخینلاشیر سانکی.