بیرینجی گوناه و موغانین یوخ عمومی توالئتلری؛
بیرینجی گوناه همشه خاطیره لرده یازیلار قالار. بیرینجی گوناهین عذابی بیر نئچه گون، بعضن نئچه آی، بعضن ده نئچه ایل سوچلونون یاخاسینی بوراخماز. پئشمان اولار، توبه ائدر. آما، بیرینجی گوناهدان سونرا، داها گوناه ائتمک، تصوور ائدیلن آغیرلیقدا اولماز. هر آن گرکدی، یئنه توبهنی سیندیریب، همن گوناها اَل آتار. داها گوناهین نه اولدوغو و گوناهدان سونرا نه اولاجاغی تانیش گلیر. داها گؤیدن ایلدیریم شاخمیر و یئرین آغازی آچیلیب سوچلونو یئمیر. داها داشا دؤنمور و گوناهین قورخوسو آرادان گئدیر. هر آن گوناه ائدیر، توبه ائدیر و یئنیدن همن آش همن کاسا. هلهلیک بو دونیادا بیر زاد اولمور، بلکه او دونیادا عذاب چکدی، اونا دا یاواش-یاواش اینامینی ایتیریر و آخیردا گوناه دؤنور اولور عادی بیر ایش.
موغاندا عمومی توالئت یوخ دور. هله باشقا شهردن قوناق گلنی بوراخ، ائله دوره کندلردن گلنلری ده بوش وئر، موغانین اؤز جاماعاتیندان دانیشاق. ایکی اوچ دوستشهرده دولانماغا چیخیرلار، دولانیرلار و دوندورمادان، نوشابهدن، دئلئستئردن ایچیرلر، بیر آز کئچدیکدن سونرا ایچدیکلری سوزوب گئدیر یئتیشیر مثانهدن بیر آز آشاغی، دای بونا دؤزمک اولمور، توالئت هارادا؟ توالئت یوخدور! گوندوز اولسا پارکدا آغاجین دالی، گئجه اولسا لاب ائله بولواردا کوللارین آراسیندا دا اؤزونو بوشالدیب، جانینی دینجلده بیلر. بو اولدو بیرینجی گوناه.
دئییرلر او بیری دونیادا بیری دئسه منی آلداتدیلار گوناه ائتدیم، منی شیطان آلداتدی، جواب گلهجک کی ‘بالام آز زیریلدا’ واختیمیزی دا چوخ آلما، آغیلوا نه گلمیشدی؟ دوشونوب باشقا بیر یول سئچه بیلمیردین؟. حاقلی دیرلار دا، باشقا یول نه قدر ایستهسن وار، خلوت بیر کوچه، بیر یاریم لئتیرلیک نوشابه قابی، معدنی سویون بوش قابی، اورژانسین توالئتی، کیتابخانانین توالئتی، دؤهدورلر خیاوانینداکی دؤهدورلر بینالارینداکی توالئتلر، ترمینالین توالئتی، مدرسهلرین توالئتلری، تاکسی ده کی نه قدر ایستهسن وار بیرین دربست توت گئد ائوه ایشو گؤر گل آددیملا شهری.
آما بو سئچیملرین هئچ بیری سئچیلمیر و بیرینجی گوناه باش وئریر. گوناهین تابوسو سینیر، داها شهرده، کوچهده، پارکدا بو گوناه چئوریلیر عادی بیر ایش اولور. بو دؤنه او ایکی اوچ دوستون هر بیرینین مثانهسی دولدو دئمیر توالئت هاردا؟ دئییر: ‘بیر دیقه اؤزومو بوشالدیم گلیم’. بیرینجی گوناها مجبور ائدنین ده کی تقصیری یوخ، سئچیم اؤزونلهدی.