گون وار عصره برابر
دوغروداندا "گون وار عصره برابر"؛ آذربایجانین یاشاسین اؤزگورلوک هارایی یوخسا حاکیمیتین نئفت سئوداسی، هانسی بو نئچهعصرلیک یاریشی اوداجاق؟ بیری یئنیلشمکله، توپراقلا، بیر میلتین وارلیغیلا ایلگیلی بیری داها آرتیق بؤیومک سئوداسیندا، بیری بیر ملتین هارایی، اوبیری بیر حاکمیتین ایستگی. اَسکیدن بیزلره گلیب چاتمیش بو یاریشین سونوجو نئجه اولاجاق؟
۹۱-جی ایل تراختور سیپاهان یاریشینی بیلیمیوردوموزدان اولان اؤیرنجیلرله بیرلیکده ایزلهییردیک. بیر سیرا ندنلره گؤره ایصفهانلیلارین سویو قدیمدن تهرانلیلارلا بیر آرخا آخمیر دیه، تراختور استقلال یا تراختور پرسپولیس ماچی اولان چاغلار بیزیم طرف اولاردیلار؛ آما تراختور سیپاهان اویونوندا اؤز تیملرین یانداشی اولارکن، بیلینجآلتیلاریندا اولان اوست دن آشاغی باخیش دیللرینه گلیردی، تورکون آدینی کیملیگینی اَله سالماق، اونلارین دا قدیمدن بئیینلرینده اَکیلهن راسیزمین توخومونون ایلکین چیچکلری تک اؤزونو گؤستریردی، مئیوهسی نه اولاجاغینی تاری بیلر. او اویونون سونوجو دؤرد بیر تراختورون خئیرینه اولدو. اوستدن آشاغلی باخیشلار بیرآز فرقلنسه ده بیر چوخ مسئلهلر یئریندهایدی.
باشقا دیللی اؤیرنجیلره "عیبی یوخ" شعاری چوخ ماراقلی گلیردی، اونلار بو شعارین حیرانی اولموشدولار، بونو دیله گتیرن آز دئییلدی. اؤیرنجیلردن سونرا شهرده تاکسی شوفئرلرینین "شما تبریزی هستین؟"، "آذربایجانی هستین؟"، "تورک هستین؟" سورولاری داها چوخ سئوینج یاشادان و ایضاح وئرمک اوچون یارانان بیر فورصت اولوردو. بوتونبونلارلا بیرلیکده اوستونلوک حیسسی اینسانی مغرور ائدیر و اوستونلوک حیسسینی بیرکز یاشایانلارین اونا نئجه باغلی اولوب اَلدن وئرممهسینه چالیشماقلاری دوشونجهمی مشغول ائدن بیر سورویا چئوریلمیشدی.
یاتاقخانالاردا تراختور یاریشلارینی ایزلهمک بیز تورکلردن باشقا، بختیاری تورکلریندن توتموش مشهد تورکمنلری و شیراز قاشقایلاریندان اولان اؤیرنجیلرینی بیرلشدیرن بیر قونویا چئوریلمیدی، اونلارین بیر چوخو تورک دیلینده یازیب اوخوماق باجارمیردیلار، تورکجه دانیشماقدا چتینلیک چکیردیلر یادا آتا آنالارینین تورک اولدوغو آما اؤزلری تورک دیلینده دانیشا بیلمدیکلرینی دئییرکن تورک دیلی و تاریخینی اؤیرنک اوچون یوللار آختاریردیلار.
تراختور تکجه بیر فوتبول تیمی دئییلمیش، بونو بیر کز بئله اولسون یاشایان آنلار. تراختورون اویونچوسو اولماق، ایران تورکلرینین فوتبولا ماراق گؤسترن گنجلرینین آرزوسو اولا بیلر، بوگون تراختور اویوندا "یاشاسین آذربایجان" هارایی، تحقیر اولونموش کیملیگیمیزی دیرچلدیر و بوتون ایران تورکلرینین قولاغیندا "کیملیگینه دؤن" پیچیلداییر، بونلار هامیسی یئنی آرانیلرین، کسرویلرین اَن قورخولو یوخوسو دور.
*تراختور نئفت یاریشینین سونوجو نه اولور اولسون، اودان بیزیک.